ලංකාවේ අපිට කෝපි එක්ක තියෙන්නේ අමුතුම සම්බන්ධයක්. අවුරුදු 200ට කලින් අපේ කඳුවල වැවුණේ කෝපි මිසක් තේ නෙවෙයි. ඒ ටික අපිට නැතිවුණේ දිලීරයක් නිසා කියලා තමයි කියන්නේ. ඉතින් ළඟකදී වෙනකන් අපි කෝපි බිවුවේ ගොඩක් අඩුවෙන්. සමහර අය අසනීප වෙලාවට විතරයි බොන්නේ. තවත් අපේ සමහර පලාත්වල වැඩිහිටි අය කුළුබඩු එකතු කරලා ‘සුක්කු කෝපි’ කියලා සැර කෝපි ජාතියකුත් බොනවා.

හා ඉතින්, අපේ කෝපි බීම වර්ග ගැන වෙන දවසක ලියමු. අද ලියන්නේ, ලෝකේ විවිධ රටවල තියෙන විශේෂිත කෝපි වර්ග කිහිපයක් ගැන.

මුලින්ම යමු ජපානෙට. ජපානයේ හදනවා කියෝතෝ-විලාශයේ සීතල කෝපි (Japanese Kyoto-Style Cold Brew). මේක සීතල වතුරයි අලුතෙන්ම කුඩු කරපු කෝපියි (freshly ground coffee) එකතු කරලා හෙමින් හෙමින් පැය ගාණක් තිස්සේ බිංදුවෙන් බිංදුව වැක්කෙරෙන විදිහට බොහොම ඉවසීමෙන් හදාගන්න විශේෂ කෝපි බීමක්. උණු වතුරෙන් හදපු කෝපි එකක් සීතල කළාම එන තිත්ත ගතිය නැති හොඳ උකු කෝපි කෝප්පයක් හදාගන්න, මේ ක්‍රමය හොඳයි කියලා තමයි කියන්නේ.

එතකොට මෙක්සිකානු කැෆේ ඩි ඕයා (Café de Olla) එකනම් අපි කලින් කියපු සුක්කු කෝපිවලට සමාන ඇති. මොකද ඒක හදන්නේ උණු උණු කෝපිවලට කුරුඳු, කරාබු නැටි වගේ කුළුබඩු එක්ක පිලන්සීයෝ (Piloncillo) කියන පිරිපහදු නොකරපු උක් සීනි එකතු කරලා. ඒක සම්ප්‍රදායිකව බොන්නේ මැටි කෝප්පයක. ඉතින් නිකන්ම කෝපි කෝප්පයක් වගේ නෙවෙයි මෙහෙම කෝපි එකක් බිව්වම මුළු ඇතුලාන්තයම ලස්සනට රත්වෙනවා.

අපිට අලුත් අමුතුම කෝපි බීමක් තමයි වියට්නාමයේ කා ෆේ ටෘන්ග් (Cà Phê Trứng) හෙවත් බිත්තර කෝපි. ඉතින් නමෙන්ම කියන්න පුළුවන්නේ මේක හදන්න පාවිච්චි කරන දේවල්. බිත්තර කහ මදයක් එක්ක රස කරපු උකු කිරි පෙන නගින තරමට මිශ්‍ර කරගෙන, උණු උණුවේ හදපු වියට්නාම් කෝපි කෝප්පයකට වත්කරනවා. එහෙම හදපු වීදුරුවක පැහැදිලිව බලාගන්න පුළුවන් කළු කෝපි වලට උඩින් ලා කහපාට වලාකුලක් පාවෙනවා වගේ බිත්තර මිශ්‍රණය. බීපු අය නම් කියන්නේ ඒකෙත් විශිෂ්ට රසක් තියෙනවා කියලා තමයි.

මේ ගමන්ම අපි සීතල යුරෝපයට ගියෝතින් අපිට හිතාගන්නවත් බැරි බීමක් හම්බවෙනවා. ඒ තමයි ස්කැන්ඩිනේවියාවේ කැෆෙඔස්ට් (Scandinavia’s Kaffeost). බලාගෙන ගියාම ඇත්තටම සරල බීමක්. හොඳ කෝපි කෝප්පයක් හදාගෙන ඒකට යූස්ටාලීපා (juustoleipä) කියන විශේෂීත වියළි චීස් වර්ගයක් එකතු කරන එක තමයි වෙන්නේ. අපිට අලුත් වුණාට, සීතල දේශගුණය වැඩියෙන් තියෙන ඒ රටවල, ශරීර උෂ්ණත්වය හොඳට පවත්වාගන්න හොයාගත්තු එක ක්‍රමයක් තමයි මේ. ඉතින් මේකෙත්, වෙන කිසිම කෝපි කොප්පයක නැති අලුත් රසක් තියෙනවා.

අන්තිමටම අපි කතාකරන්නේ ඩැල්ගෝනා කෝපි (Dalgona Coffee). ඔව් ඔව්, කොවිඩ් කාලේ ට්‍රෙන්ඩින් ගියේ අපේ රටෙත්, ඒකම තමයි. දකුණු කොරියාවේ උපත ලබපු මේ කෝපි විස්තර කරන්නේ හරියට කිරි උඩින් පාවෙන කෝපි වළාකුලක් වගේ කියලා. ක්‍ෂණික කෝපි, සීනි, උණු වතුර කියන තුන කලාවට මිශ්‍ර කරලා හදාගන්න මේ කෝපි කෝප්පය ජනප්‍රිය වුණේ ම, විශිෂ්ට ලස්සන පෙනුමයි සැහැල්ලු සුමුදු බීමක් වීමයි නිසාමයි. ඉතින් ඔයාලා ඒ කාලේ ඒක හැදුවේ නැත්නම්, දැන් උත්සාහ කරලා බලන්න.

මෙතන අපි කතාකරලා නැති, ඔයාලා දන්න ප්‍රාදේශීය කෝපි තියේ නම්, mention කරගෙන යන්න. ඔයාලටත් නියම කලාවට කෝපි හදන්න ඉගෙනගන්න ඕනිනම්, ඇවිත් CBBS එකට එකතුවෙන්න.

============================

කළම්බෝ බාර්ටෙන්ඩර් ඇන්ඩ් බැරිස්ටා ස්කූල්